做大佬，感覺始終唔同啲。漢諾威今晚喺德甲主場對史浩克04，未必頂得住唔輸。雖然漢諾威有教練史隆卡領軍倒戈，肯定唔會放軟手腳，但史浩克射手亨特拉爾難得有機會做大佬，又要騷哥利博球會開張肥約畀佢，唔入波點對得住自己？史浩克讓平半照撐！

　　史隆卡喺04年開始做史浩克助教，06年轉做教頭，玩唔夠兩季因為高層要求苛刻被炒魷，呢次帶領漢諾威再遇舊老細，正點都唔會鬆章。更何況，即使馬美迪奧夫養傷，漢諾威仲有耶高爾同艾度拿奧爾入波，火力依然有保證？

　　由於財政問題，今季史浩克冇錢買人，魯爾被放棄後，上季德甲神射手亨特拉爾會成為史浩克真正大佬，歐國盃入選蘭大軍都得唔到重用，難得史浩克高層對佢不離不棄，仲話要提早同佢續約，無論亨特拉爾想留低定跳槽，睇怕都會踢好波報答球會再講，有條件幫史浩克開上盤。