西甲獨腳戲上演榜尾護級生死對決，包尾馬略卡主場迎戰尾二切爾達，未計尋晚西甲戰果，兩隊落後安全線四分，今場贏到都仲有得追，輸波就睇怕凶多吉少喇！雙方防守同樣曳到冇朋友，馬略卡近三戰失十三球勁得人驚，切爾達後防亦好唔掂，水鬥水，博大盤！

　　馬略卡以往靠小島威力企穩西甲，但今季班波愈踢愈唔對辦，聯賽主場十四戰贏得四場，搞到依位列榜尾危危乎，前景唔多樂觀。馬略卡前線擁有希密特、域陀同杜斯山度士等優質進攻球員，人腳唔差，大軍聯賽三十戰勁失六十三球，拍住拉科係西甲失球最多球隊，平均每場失兩球有多，季尾仲惡化咗，對上三仗失咗十三球，唔計面對班霸巴塞同皇馬各失五球，遇上護級大敵拉科魯尼亞都失三粒，真係冇得救！

　　切爾達喺主場出擊都仲有多少戰鬥力，但佢哋客場表現真係曳到離晒譜，對上九次作客輸八場，單計近三場作客失咗足足十球，好似完全唔識守咁，非常唔掂。不過，今場波關乎球隊護級大業，切爾達全軍上下都會分外肉緊，即使首席射手伊亞高艾斯巴斯要坐波監，佢哋都會谷埋最後一啖氣同對手死過。兩軍首循環交手各一言和，今次肯定唔會咁和平，雙方防守不穩，但又急於搶攻，預期會合演一場入球騷，捧大啦！